2023 წელს, პირველად, ორგანიზაცია „უფლებები საქართველოს“ მიერ წარდგენილი ინფორმაციის საფუძველზე, „მოქალაქეობის არმქონეობის შესახებ ევროპულმა ქსელმა“ (European Network on Statelessness) საქართველო შეიყვანა ევროკომისიისათვის წარდგენილ ანგარიშში, რომელიც ევროკავშირის გაფართოების პროცესში მონაწილე ქვეყნების შესახებ მომზადდა. ანგარიშის მიზანია, ხელი შეუწყოს ევროკომისიას 2023 წლის გაფართოების პაკეტის მომზადებაში, რომელიც მიმდინარე წლის შემოდგომაზე გამოქვეყნდება და შეაფასებს საქართველოს პროგრესს ევროკავშირში გაწევრიანების კრიტერიუმების დაკმაყოფილების მიმართულებით. 
 

„მოქალაქეობის არმქონეობის შესახებ ევროპული ქსელი“ ევროკომისიას ყოველწლიურად წარუდგენს წერილობით ანგარიშს ევროკავშირის გაფართოების პროცესში მონაწილე ქვეყნებში მოქალაქეობის არმქონეობის დაძლევის მიმართულებით მიღწეული პროგრესის შესახებ. მიმდინარე წელს, პირველად, ანგარიშში აგრეთვე აისახა ინფორმაცია საქართველოს შესახებ, რომელიც, მათ შორის, ეყრდნობა „უფლებები საქართველოს“ მიერ მიწოდებულ ინფორმაციას. 
 

ანგარიშში ყურადღება გამახვილდა საქართველოში მოქალაქეობის არმქონეობის დაძლევის მიზნით გადადგმული ისეთი მნიშვნელოვანი ნაბიჯების შესახებ, როგორებიც არის მოქალაქეობის არმქონე პირის სტატუსის განსაზღვრის პროცედურის დანერგვა და იმპლემენტაცია, სტატუსის მქონე პირებისთვის სხვადასხვა სახელმწიფო სერვისზე წვდომის უზრუნველყოფა, მოქალაქეობის არმქონე/უდოკუმენტო პირების იდენტიფიცირებისა და დოკუმენტირებისთვის „კარდაკარ“ კამპანიის განხორციელება, ასევე, მოქალაქეობის არმქონე პირებისთვის შესაბამისი სტატუსის დადგენისა და საქართველოს მოქალაქეობის ჩვეულებრივი წესით მინიჭების შესახებ განცხადების წარდგენისთვის განსაზღვრული მომსახურების საფასურის გაუქმება. განაცხადში ასევე გამახვილებულია ყურადღება სახელმწიფოს მიერ გადასადგმელ შემდგომ ნაბიჯებზე.
 

საქართველოსთან ერთად, ევროკომისიისთვის წარდგენილი განაცხადი მოიცავს ინფორმაციას კოსოვოს, მონტენეგროს, სერბეთის, ჩრდილოეთ მაკედონიის, ალბანეთის, ბოსნია და ჰერცეგოვინას, უკრაინისა და მოლდოვის რესპუბლიკის შესახებ და ეფუძნება აღნიშნულ ქვეყნებში მომუშავე, ქსელის წევრი ორგანიზაციების, მათ შორის, „უფლებები საქართველოს“ მიერ წარდგენილ ინფორმაციას.
 

„უფლებები საქართველო“ მოქალაქეობის არმქონეობის საკითხზე მომუშავე ორგანიზაციების ევროპულ ქსელს (European Network for Statelessness) 2021 წელს შეუერთდა. ქსელი 41 ქვეყანაში მოქმედი 180-ზე მეტი სამოქალაქო ორგანიზაციისა და ინდივიდუალური ექსპერტის გაერთიანებას წარმოადგენს, რომლის მიზანიც ევროპის მასშტაბით მოქალაქეობის არმქონეობის პრობლემის აღმოფხვრა და მოქალაქეობის არმქონე პირებისთვის საერთაშორისო ნორმებით გარანტირებულ უფლებებზე წვდომის უზრუნველყოფაა.